Kandidati për kryeministër nga LVV, Albin Kurti pas votimit u ka bërë thirrje qytetarëve që të shfrytëzojnë të drejtën e tyre për të zgjedhur deputetët e rinj të legjislaturës së dhjetë të Kuvendit të Kosovës.

“Porsa votova këtu në Fakultetin Ekonomik për legjislaturën e dhjetë të Kosovës. Sot është një ditë edhe e bukur edhe e rëndësishme. I ftoj të gjithë qytetarët ta ushtrojnë të drejtën, ta përdorin mundësinë për tu përcaktuar për përbërjen e Kuvendit të ardhshëm , dhe uroj e besoj e punojmë që legjislatura e dhjetë të konstituojë sa më shpejt Kuvendin e ardhshëm e njëkohësisht ta formojë Qeverinë e re”, deklaroi Kurti.

Ai tha se pjesëmarrja në votime reflektohet edhe në cilësinë e zgjedhjes dhe ne legjitimitetin e institucioneve.

“I falënderoj të gjithë qytetarët për durimin, vëmendjen e angazhimin që kanë treguar, e gjithashtu shpresoj që pjesëmarrja do të jetë masive, sepse pjesëmarrja reflektohet edhe në cilësinë e zgjedhjes por edhe në legjitimitetin e institucioneve”, deklaroi ai, pasi ushtroi të drejtën e tij të votës për zgjedhjet e parakohshme parlamentare.